fordert der Graff vonn Cleůen sein manschafft fůr ÿn Vnd redt diese
maÿnůng. Jch hab ein diener genant Otto schůtz. der mir hat
trewlich [ergänze: gedient] / vnnd dem ich hab vbel gelonnt. Darůmb bin ich Inn
maÿnůng ÿn wie er wirdig ist. vnd verdient hat zůbelonen. Vnnd
ÿm mein tochter frewlin Elisabet eelichenn zůgebenn. Derhalbenn was
ist ewer rath. Daraůff ÿderman stillsweig. Vnnd es fůr ein gespot hielt.
Aber der Graff vonn Cleůen hett befolnn. das sein Fraw vnd tochterr.
solten zůsambt ÿrenn Jůnckfrawen aůffs zcirlichst geschmůckt kůmmen.

Als nůn dieselbenn kůmmen warn. schickt er aůch noch diesem Lannt=
graüenn. Vnd Sagt also zů ÿm. Otto dů hast mir etlich Jhar erbarlich
gedient vnd ich hab dir nÿe recht gelont. Darůmb bin ich willens.
dir itzt zülonenn. Hie steet mein tochter Elisabet. wie gefelt sie dir. Sagt
Otto. Gnedigerr herr woll. Sagt der Graff Wiltů sie dann habenn. so
wil ich sie dir zů lon gebenn. Anntwort Otto. hab ich dann so lang vmb
hon vnnd spott gedient So bin ich zůlanng hie gewest. Daraůff
der Graff abermals sprach. Da steet sie / begerstů sie zů der ee. So sprich
Jha. So wil ich dir mit ÿr ein fůrstliche mitgifft gebenn. Vnnter
andern vil wortenn. bewilligt entlich der Lanntgraff in dise haÿrath
Daraůff der Graff vonn Cleúen das eelich beÿligenn allenthalbenn
aůffs aller herlichst aůsrichtet Vnnd wiewol sich ÿederman
darob verwůndert / vnnd betrůbt was. Also hett der Graff sein tochter
einem geringn mann gegebenn. Doch sagt er wider sein Frawenn. noch
andern was hocher gebůrt diser Otto was / bis der vonn Hohennberg
vonn Ach wider kümmen was. daraůs darnach nit weniger fraÿde.
erwüchs dann vor betrůbnÿss gewesenn wass.

Also zcog der Graff vonn Cleůen mit diesem Lanntgraůen vnd seiner
brawt gen Martbůrg. Da sie noch ein hoff hieltenn Darnach
hielt er zů Spangenberg hoff / vnnd starb an leibserbenn.