Vonn dieses Fůrsten Frawen
Vnnd kindernn.

Diser Lanntgraff Lůdwig zů hessenn genant der Jůnckherr vnd der keÿn
weib nemenn solt. betracht entlich vil besser vnnd loblicher einem
herren sein. sich mit eÿner eelichen gemahell. dann mit eÿner bůbÿn
zůhaltenn. vnd beschloss wie wol an schadenn seÿnes brůder vnd desselben
kinder ein Frawen zůnemen. Vnd nam Frawen Margret ein geborne Greůÿn.
von Spanheÿm. Vnd hat mit ÿr gehabt zwen Sůn. Lantgraff Otto der
Jůng starb. vnd Lantgraff Herman. Item ain tochter Elisabet Eptissin zů Eÿsennach.