Wie dieser Lantgraf ist von der gaistlickait zům
Fůrstenthůmb vnd regiment seines Erblands kůmmen.

Diser Lanntgraff herman stüdirt ein zeit zü Prag. Darnach nam ÿn
sein Vetter der ErtzBischoff Otto vonn Magdebůrg zů ÿm In maÿnůng
ÿn gaistlich zůmachen vnd mit gaistlichen gütern gnůgsam zubegaben
Inn dem starb sein brůderr Lanntgraff Otto. Derhalben
hertzog Otto vonn Braůnswig nach dem Fůrstenthůmb hessenn abermals
trachtet / Aber der Lantgraůen Vater gůnt die Herrschafft
mer seinem dann frembden geblůt. Vnd fordert seinen Jůngen Vettern
Lantgraůen herman der hett sollenn gaistlich werdenn. ein. vnd macht
ÿn zů einem herrenn vnnd Fůrsten in hessenn Vnd wiewol
er vil widerstants hett. vonn Bischoff Adolff. vnnd Bischoff Gerlach
vonn Meintz. bedenn von Nassaw gebornn. doch bleib er.