geblůts. Vnnd den sie vor allen andern Fůrstn woltenn haben zů ÿrem
herrenn. Demnach er sich rustet wol mit vierhůndert
pferdenn vnnd kam bis gein Ach. Daselbst wart ÿm vom Rath ain
schalck vnter awgen gestalt. der ÿn beschůldigt also. wer er der maÿnůng
dahin kůmmen. die Stat Ach einzunemenn. Daraůff der frům Fůrst
antwort. er hets nÿe in sein gemůt genůmmen. Der schalck sagt zu be=
stetůng seÿnes vnwarhafftenn můtwillens. Got geb das ich toricht wer
wenn der Lanntgraff nit wer darůmb gen Ach kůmmen. das er es wolt
einnemen Daraůff derselb schalck sÿnlos wart. vnd sich zů tode
tobet. Als das die vonn Ach sahenn ertzaigtn sie dem Lantgraůen vil ere.
Aber er lies ab vonn fůrgenůmmener raÿs. vnd zcog wider zůrůck. Der=
halben er důrch erticht schalckhait vmb Prabant kam.

Wie dieser Fůrst zů
Rom gewest ist.

Dieser Fůrst ist zů Rom gewest / vnnd hat die Rosen vom Babst Martinůs
dem Fůnfftn erlangt. Von dem er ist aůch ein Fůrst des Frids genant worden