Von schweren kriegen in der haidenschafft.

Jnn dem selbenn Jar wart aůch gros krieg in der haidenschafft zwischen dem
kaÿser vonn Tartarn. vnd dem Soldan. Tůrcken. Saracenen. vnd Armenien.
Als die selben Accon. vnnd das ganntz hailig [ergänze: Landt] mit sambt Jerůsalem mit gewalt
erobbert. Vnd acht Jhar Innen gehabt hetten. Darůmb zog der kaÿser von Tartern.
mit einem grossen mechtigen heer. In das hailig Landt. vnd gewan Jherůsalem
Vnnd alle Stete die darümb ligenn. Derhalben der konig vonn Armenien
zog ÿm mit aller seiner gewalt. entgegenn. Vnd verherten das Landt. vnnd
bestrÿtenn die haÿden. Gewanen aůch alle Stete bis an Damascům
Vnnd fingen In zweÿen streiten Sibentzig taůsent. Saracenen vnd Tůrcken.
Es wůrden aůch in denselbenn slachten. die Edelste haidenn vnd annder
gemeÿn Folck vnzellicher haůffen vmbgebracht. Erlangten darůon vn=
sprechlich gros gůth.