Vom anfang des Deůtzschen
Ordens in Preůssenn.

Als die Brůder Sannt Johans ordens aůs der Stat Ptolemais Im hailigen
Landt vertriben warn. kamen die Edeln vnd kriegserfarne lewth wider
Inn Germanien Auf das sie nůn nicht mit můssickait vertůrben.
gabenn sie dem kaÿser Fridrich dem andern des Namen zůerkennen. wie
das das Landt zů Prewssen in grossem vnglawben stůndt / Vnd wie die
Prewssen die Cristen zůmermalh mit heer vberzogen. vnd zů Lanndt /
vnd aůf dem wasser. ser beschedigten yn aůch nit allein das Vÿh. Sůnder
aůch menschen grosser antzal wegtriben. Welchs ÿn ein gros mitleÿden
gegen ÿrn eben Cristen brecht. Darůmb hetten sie ÿn fůrgenůmmen.
das vngezempt vncristlich Folck die Prewssen zůzemen. vnd gehorsam
zůmachen. Wenn allein er der kaÿser ÿn wolt das Landt zů Prewssen
ewiglichen zůbesitzen geben. so sie dasselbig Lanndt mit der gewalt
wůrden erobbernn. Solch erbieten gefiel dem kaÿser Fridrich wol. Vnd
gab ÿn das Lanndt zů Prewssen. das er ÿn mit eÿner gůlden Bůldenn