Vngarnn mit sechtzig taůsent man in Merern. Vnd verhert dasselbig ganntz
Landt. Da gegen der konig Ottocar vonn Behem. mit grosser gewalt.
vnd Nemlich mit hertzog Albrecht von Sachssen. Marggraf Otto vonn
Brandenbůrg. Hertzog Albrecht vonn Braůnsweig vnd mit seinem LantFolck
dem konig vonn Vngarn vnd fast als starck. als sein gegentail was begegent /
Als nůn der konig von vngarn des konigs von Behem Im Feldt gewar wart.
schicket er zů den Wenden sie zůerÿnnern ÿrs gelůbds Also erhůbenn sich
dieselbenn mit aller gewalt. zogen in das Landt zů Sachssen vnd verwůsten
das Landt mit brant vnd schlacht / Sie gewanen aůch des hertzogen von Sachssen
Slos Gůmmere. vnd namen hinweg Sant Barbare hewbt neben vil edeln
vnd kostlichen andern claÿnatn. Welchs wirdig hailthůmb entlich
gein Dantzken ist kůmmen. Da es in grossen eren vnd wirden wirt gehaltn.
In mitler zeit slůgen sich die vilbenante zwen mechtige konige zů acht mal
miteÿnander das kaÿn tail den Sig wider gewan noch verlor. Aber In der
gnantn slacht gewan der konig von Behem mit hilff der deůtschen. vnd der
konig Bela vonn Vngarn wart ser vnd also verwůndt das er kaůmeth mit
dem leben darůon kam. Es ertrancken aůch etliche taůsent man seynes
Folcks in dem wasser Mara. Darůmb wůrden die Sechssische Fůrstenn.
vnd herren zů Ritter geslagenn. Aber hertzog Albrecht von Sachssen vmb das
er Sant Barbare hawbt verlorn hett. fiell er in kranckhait vnd starb.

Wie ein konig von Denemarck ist
von ainem Graůen gefangen worden.

Bey disen tagenn nam ÿm konig Woldemar von Denemarck fůr die deutzschen
mit gewalt vnnter sein gehorsam zůbringen. Vnd als er In vil streitenn