seiner gerechtickait. vnnd gab seinem sůn Abell des Graůen Adolffs tochterr.
zu ainem eelichen gemahel. vnd zog wider In sein Landt. Also fůgt sich
hertzog Albrecht von Sachssen gein Lůbeck. von wegen des Romischn kaysers
vnd bestetigt ÿn aůs beůelh gedachter kaÿserlichenn Maiestat alle ÿr
vorige priůilegia vnd freihait. Derhalben die von Lúbeck die
Denen kůrzt darnach aůs ÿr Stat vertriben. vnd aůs dem Sloss ein Closter
prediger ordens. machtenn.

Von ainem schweren krieg zwischen den von
Genůa vnd den Venedigern.

Bey disen zeiten begab sich ein schwerer krieg zwischen den von Genůa vnd den
Venedigern. Nach Cristi gebůrt zwelffhůndert vnd Im achtvndFůnftzigstn
Jhar. Welcher so hefftig wart. das er benanten zweÿen Steten grossen schaden
thet. vnd gar schier der gantzen hailigen Cristenhait zů mercklichem
nachteÿl vnd vbel bracht. Wann nachdem die Venediger. Gennenser
vnd Pÿsaner. Vierh vnd Sechtzig Jhar miteynander die zwů mechtige vnd
reiche Stete Ptolemais vnd Tyrůs ÿnnen gehabt vnnd besessen hetten. Vnd
daselbst die Niderlag aller kauffmanschafft aůs Oriendt vnd Occident.
gehabt. tailten die benante dreÿ Stete solche zwů Stete vntereÿnanderr.
zwitracht vnd vnaÿnickait zůůerhuten. Aber wie dem. so wůrdenn sie
in oben angetzaigtem Jhar Irrig vber ainem Closter des hailigen Abts Sabbe.
vmb das ein ÿde Stat vermeint dasselb zůbehalden. Derhalben die vonn
Genúa durch gůnst des Statpflegers dasselb Closter einamen. vnd die Venediger
daraůs trÿben. Da důrch wůrden die Venediger vnd Gennenser vnaÿnig
Also gebot der pfleger den Venedigern so daselbst warn. miteÿnander von Ptole=
mais hinweg zůziehen. Da zogen die Venediger gein Tyrůs. vnd vnange=
sehen den angenummen Bůndt bewegten sie die Pisaner wider die von Genůa
oder Janůa. Demnach die Venediger ein krieg mit hůlff der Pisaner wider die /