vonn Genüa fürnamen. vnnd sich mit dem konig Mamfred von Sicilien.
ein verbůntnÿs machten wider die von Janůa vnd verbranten ÿn Ir grostn
Class am gestat zu Ptolemais. vnd In dem selben zůndten sie aůch das Closter
an vnd kerten es zů grůndt vmb. Dadůrch wůrden die vonn Genůa
mer bewegt dann erschreckt / vnd liessen beraiten ein new Classenn. Vnd
begenten [lies: begegenten] den Venedigern beÿ Tyrůs. Da sie aůch den krieg zůůerenden baider
saits beslossenn. Aber die Venediger vnnd Pisaner behielten den Sig / Vnd
gewanen den Gennesern ein grosse slacht an. gewanen ÿn aůch Fůnffvnd=
zweintzig schiff ab. Die sie ertrenckten vnnd darnach gein Tyrůs vnd Ptole=
mais ziehendt. der Genneser besetzůng vnd gebew alle zůbrachen. vertriben.
die gennenser vnd Ir vnderthanen. Vnd Namen ÿn alle Ir gůter. Welche
slacht den Babst Alexander den Vierten vnd die Gennenser hoch beweget.
Derwegen aůch die vonn Genůa zůstůndt sich mit dem kaÿser Michael.
Paleologois von Constantinopel verbůnden. Cretam ader Candiam vnnd
ander kriechische gegent vnd Stete den Venedigern alle abgewůnnen Aůch
ÿn sůst vnzellig andere grosse scheden ertzaigten. Namen aůch entlich der
Venediger gestat eÿn. Vnd fingen Raÿneriům den SibenvnndViertzigsten
hertzog von Venedig. mit andern Venedigern. Welcher hertzog darnach mit
grossem geldt von den Venedigern wider geloset wart.

Vonn einem Cometen.

Nach Cristi gebůrt zwelffhůndert vnnd Im ViervndSechtzigstenn Ihar.
ist ein vbergrosser Comet erschÿnnen vnd lenger dann zwolff wochenn
gesehen worden. hat aůch mit der cranckhait des Babsts Vrbani dess
Vierten. Welcher des hailigsten warleichnams Fest verordent hat / ange=
fangen Vnd ist in der nacht da der Babsts gestorben. wider verschwůnnen.