Wie die Růgen abermals
Cristenn sein wordenn.

Die zeit hetten die obotriten einherren genant Niclotůs. vnd als er merckt das
der konig aus denemarck Ertenberg wider ÿn kriegen vnnd mit heer zihen
wůrd. verbrant er alle sein schlosser Ilaw. Mechelnbůrg Swerin Důbin
vnnd anndere aůsgenůmmen Warle welchs er behielt. Diezeit
aůch der konig Woldemar vonn denemarck der Růgen konigraich gewan.
vnd bracht die Růgenn wider zům hailigen glawben. Wann als die
můnchen vonn Corbeÿ sie in vorzeiten bekert hetten. baweten sie ÿn ein
kirchen in Sant Veits ere. Da aber die benanten můnch von Corbeÿ
wider heimzogen. fieln die Růgen wider vom glawben Derhalben da sie
der konig vonn Denemarck vberwůndenn hett. richtet er zwolff kirchen
aůff in dem Lanndt Růgen. vnd gab ÿn Pristerschafft sie also Im
glawben zůvnterweÿsen vnnd zůerhaltenn. Man findet aůch das die
Růgen in yrm vnglawben ÿrm Abgot menschen geopffert habenn.