Vonn ainer wůnder geschicht
Inn Důringen.

Beÿ diser zeit geschah ein trefflich wůnder geschicht in Důringn Welchs
zu ainem grossen trost allen Bůsfertigen sůndern vnd sůnderÿn raichen
mag. Ain Priester trůg beÿ dem dorff Flarcheÿm ader Fladicheÿm das
hochwirdigst Sacrament In maynůng ein kranck mensch zůberichtenn.
Vnnd begegent aůf dem weg einer gemaÿnen sůnderÿnn. Als nůn dieselb
sah das sie dem allerhailigsten Sacrament nit kůnt weichenn. erschrack sie
vber die mas ser. vnd nachdem sie sich von wegen der grosse vnd vnreÿnickeit
yrer sůnde vnwirdig achtet. Got vnnter aůgen zůkůmmen. trat sie
zůstundt vonn dem steÿg. vnd fiel aůff ir knÿe mitten In das koth. aůs
grosser demůt vnd Innickeÿt sprechendt. mit ser weÿnenden awgenn.
O got mein herr. schopffer. vnnd erloser. bistů / der / die welt geschaffenn.
vnd mit deinem blůt erloset hast. dess lebendig leichnam in diser bůchssen
wirt begriffen vnd getragen. so erbarm dich vber mich / ein arme sůnderÿn.
die dir aůch nit gern begegent. Vnnd vergib mir mein sůnd. Welche ich
beger zůbussenn. Also baldt vnd dieweil das arm weibsbildt mit grossem /