vnnd betrůbnis also mit dem hertzen vnnd leÿchnam Im kot lag. ant=
wort ein stÿm aůs dem Sacrament bůchslein also zů latein. Parcere
soleo. et culpas dimitto. Welchs zů Deůtzsch ist. Jch pfleg zůůerschonen
vnd die sůnde zůůergebenn. Daraůf der priester aůs grossem erschrecken
stilstůndt vnnd sein fůs nit dorfft bewegenn. Derhalben das weib sprach.
also. O AllerBarmhertzigster Got ich allervnseligste sůnderÿnn
verstee keÿn lateÿn Weyl nůn der Almechtig Got
nit leyden kůnt das die bůsfertige sůnderÿn solt an sein gnad abscheiden.
Derhalben redt er deůtzsch aůs der bůchssenn also. Dů bist gesůndt ge=
macht. Gee hin vnd sůndt nÿmmer. Welche darnach aůfstůndt
dem priester also baldt nachfolgt. vnd alle ÿr sůnde beichtet. Ir leben aůch
an verweÿlůng bessert. Vnd In ainein [lies: ainem] Cristlichen wesen seliglich endet.

Vonn züfelligen geschichtenn

Beÿ disenn zeiten Nemlich nach Cristi gebůrt zwelffhůndert vnnd Im
Sechsvnnddreÿsigsten Jhar wůrden zwenvnnddreÿsig Jůden zů Fůlda
von den Cristlichen Pilgram erstochenn. Wann kůrtz.
daůor zwen Iůden an aÿnem grossen Fest / ainem můlner vor der
Stat wonhafftig Fůnff kinder weÿl er mit seiner Frawen in der
kirchen war. getot hettenn. vnnd das blůt In eÿnen leÿnen gewichstn
sack gefasset. Vnnd an solcher graůsamen vbeltat vngesetigt / aůch
das haws vnnd die můl angetzůndt vnd verbrant.