Wie ein konig zu Sweden sein zwen brůder
Jhemmerlich entleibt hat.

konig Berigar vonn Sweden fordert sein zwen brůder Erick vnd Woldemar
baide hertzogen zúsich. Im scheÿn als soltenn sie mit vnd beÿ ÿm die hailigen
Weÿnachten mit frolickait haltenn. Also kamen die zwen hertzogen an
alle besorgůng aller vnbrúderlicher maÿnůng. Da sie aber vber dem ersten
abentmal frolich sassenn. wůrden aus befelh des konigs sein brůder von dem
tisch weggenůmmen gefangen. vnd In ein hefftig gefencknÿs gesatzt.
darInnen sie gar hertiglich wůrden gehalten. vnd also das man yn nicht
mer raicht dann wasser vnnd brot. Darůon sie vor dem zwelfften
tag hůngers storbenn. Als solch graůsam vntat das LantFolck erfůr.
erhůb es sich mit aller macht wider den konig. vnd vertrib ÿn aůch die
konigÿn aus dem konigraich vnd koniglichen standt / Vnd alle die Jhenige
die mitwissent derselben tat warn gewesen. die tottenn sie alle. Aůch
belegt die Landtschafft des konigs sůn. konig Magnůs berait zů konig
gekront aůff dem Slos Steckebůrg. Da sie nůn das Sloss gewůnnen
hetten. vnd den Jůngen konig gefangen. Bestelten sie ÿm eÿn mess.
Vnd hiessen ÿn beichten vnd das hochwirdigst sacrament enpfaen. vnd zůstůndt
darnach slůgen sie Im den kopff ab. vnd erwelten des vmbgebrachtn hertzog Ericks
Sůn. die zeit fůnfJherig mit Namen Magnůs zů yrem konig. Welcher darnach
zweÿer konigRaich konig wart. zů Sweden vnnd Norwegen.