Von einer heerfart In das hailig Landt.

Beÿ disen tagen war ein grosse heerfart zům hailigen Landt von den konigen
von Vngarn. vnd von Behemen vnd andern Fůrsten wider die vnglawbige
Als nůn die haiden merckten das sie den Cristen nicht mochtenn widersteen.
flogen sie in ain ser Vest Slos. die Cristen folgten nach. vnd belegten die haidenn.
Aber sie wůrden von solcher belegůng důrch betriglickait des hohmaisters in
Preussen wendig gemacht. villeicht aůf bit vnnd anregen der haidenn.
Wann der hohmaister schrib den fůrsten. wie das ÿm die haiden In
sein landt zogen dasselb zůůerheren. sie vmb beÿstandt bittendt. Also
brachen sie aůf zogen In preůssen. dem hohmaister vnd seinem Landt.
rettůng zuthůn. Als sie aber kamen. befůnden sie sich betrogen. Darůmb
fingen die Compther den hohmaister. vnnd totten ÿn.