Von einer wůnderlichen geschicht einem
herren in Důringen widerfarnn.

Beÿ disen tagen was ein herr in Důringen gnant herr Fridrich von spangenberg
vnd Trÿfort ein grosser vnkewscher. Als nůn derselb vil Jůnckfrawen vnd Frawen
yrer Eren berawbt hett. wolt er eins nachts zů seiner liebhaberÿn ain reiten. Nůn
was die nacht so finster. das er nichts sehen kůnt. dieweil er aber bethet vnser lieben
Frawen gezeiten. wan er gelart was. vnd nach gedůncken reÿt kam er aůf den
hoenfels der helderstan genant. Da wart das pferdt schewen. Also notiget er
das mit sporn. vermeinet es hett ainen wolff gesehen. Deshalb das pferd von
der hohe dess fels mit ÿm In das tif tal sprang. Da es sich breÿt gleich einem
kůchen fiel. Aůch zubrach der sattell. sein sporn. vnd swert zů stůcken. an
verserůng seines leibs vnd lebens. Wann ÿn daůcht wie ÿn ein vberschone
Fraw an dem fall In Ire arme aůfgefangen hett. Deshalb da er wider heÿm
kam. alle sein freůndt lůde. Allen den er vbel gethan hett. wandel vnnd
erstatůng thet. Vnd mit grossen gaben begnůget. Vnd als er gebeicht hett.
sein brůder vnnd freůndt gesegent. gieng er die tag seines lebens nach dem all=
můsen. zů Eÿsennach. in gestalt eines bůsers. barheůbt vnnd barfůs. da er
wider fleisch noch Fisch as. vnd wider weÿn nach bÿer tranck. Vnd als er
starb bat er sich aůf vnnser lieben Frawen kirchoff hinter der maůrn zůbegraben.
durch sein solch bůsfertickait vnd rechtfertigůng. als wir hoffen. von dem
almechtigen mit der ewigen selickait begabet.