etliche sagenn. das die Sachssenn sein vonn den Denen. oder Gothen. Etliche von
den Nortmannen. Vnnd etliche vonn Britannia. oder aůs Engellandt kůmmen.
Die Cronicka gnant Maior Cronicka genciům hat also vonn der Sachssenn.
Vrsprůng. Als Rom was. Vierhundert vnnd Sechsvndzweintzig Jhar alt
wordenn. da der vberstreitbar konig zů Macedonien gnant der Gros
Alexander. mit bewappenter handt. vnnd ainem grossen heer. Nemlich mit
zweÿvnnddreÿsig tawsent zů Fůs. Viertawsent vnd Fůnffhúndert zů Ross
mit hundert vnnd achtzig schiffen, Vnd zům tail aůch mitdraw
vnnd bit gar schier die gantze welt. bezembt vnnd vnter sich gebracht hat.
zog er in das Lanndt Cecilien vnd kriegt mit der Stat Tarsus. Als Im
nún das LanntFolck In Cecilien hertiglich widerstůndt. wart er von einem
Fůrsten genant Petreiůs oder Petracůlůs freúntlich entpfangen vnnd
eingelassen Derhalben ÿn aůch der Gros Alexander zů
einem mit Regenten seines heres ordent. Als aber benanter Fůrst
nach konig Alexanders tot wider heÿm zog. wart er vonn meiniglich
als ein Verreter vertrÿbenn. Derhalbenn er gedrůngen wart sich zů
der vberigen schar des Macedonischenn heers zůhaldenn. Da nůn die
Macedoner den selben hawffen als ein vrsach aller vnrw aůch nicht
woltenn wieder lassenn einkůmmen. Darůmb dieselben elende
Macedoner benanten Petreiům zů Irem oberstenn hawbtman setztenn.
derhalbenn sie aůch die Petrioli gnant werdenn. Als sie nůn etliche ver=
wapent schiff zůsammen gebracht hettenn. machtenn sie ein verpůnt=
nůs so lang mit meniglich zůkriegenn. bis sie entwer ein aÿgen Landt
mochtenn erlangen. oder aber alle erslagen wůrden. Darůnder důrchzogen
sie vil Jnselnn. vnnd lagen itzůndt vnter. itzůndt oben. Vnd brachtenn
aúch zu merer sterckůng die Meerrawber an sich. Vnnd fůhrn důrch
Sicilien vnnd Hispanien in das Gros Mehr. Weÿl aber hispania
mit den Romern besetzt was. můstenn sie dasselbig Lanndt verlassenn.
vnnd nach Franckraich ziehenn. Vnnd entlich zedrenten sich benante
schiff also. das etlich in die See verslagen wordenn. Vnd etlich in prewssen.
etlich in Flandernn. Etlich in Friesenn. vnnd etlich in Důringn kamenn.
Welche Lanndt die zeit vnwonhafftig vil gemos vnd vngebawet warnn.
Aber etlich ser schrifftverstendige lerer achten. das die Sachssenn Ires
ersten Vrsprůngs sein aůs dem Lanndt Phrigien kůmmen. darInn
In vorzeitenn Troia mit der hochberůmbten koniglichen Stat gelegen hat.
Wann als Stephanůs Bÿzanciůs schreibt So seint die Sachssen ein Folck
etwann in der Inseln Cebrica Chersonesůs wonhafftig gewest.
Welche Insel nach vnnterrichtůng des lerers Suida zů dem Lanndt
Troia gehort hat. Derhalbenn aůch etlich ser alte Beschicht
Lerer schreibenn. das die Sachssenn etwan zůsambt den zweÿenn be=
růmbten Folckern den Cimbren oder Cimmerien vnnd den M ÿ senn.
seint mit heer vnnd gewalt in das Tewtsch Landt getzogen. vnd sich in die
gegent gesetzt. da die Sachssenn aůch noch beÿ unnsern tagen sitzenn.