Vnnd nach der maÿnúng die da schreibenn das die Sachssenn aůs dem Landt.
Phrigia herkůmmen seint / So sein die Sachssenn der aller Eldisten Nacion
vnnd Folcker eÿns. vnnd vil elder dann das Folck Arcades genant. Welche
sich in vorzeiten růmten elder sein dann der mondt wer. Welchs daher kam
das Endÿmien des Landts vnnd Vrsprůngs einer aůs Arcadien der Erst
des monds Lawfft vnnd bewegůng befůnden vnnd gemarckt hat. Derhalben /
aůch der Lerer Mnaseas schreibt das die Arcader vor dem mondt regirt haben.
Das ist das die Arcader habenn konige gehabt. ee Endimÿen ist geborn worden.
Darůmb seint die Sachssen vil eltern herkůmmens dann die Arcader / Dann
man findt das etwann etlich Nacion sein vntereinander des Irrig gewesen.
Welche die Eldist wer. Also habenn sich die Iůden aůff beweisůng Moÿsi
fúr die Eldistenn vnnd Ersten menschen angetzogenn. Daraůff die
Egipcier fúrgegeben haben als weren sie die Eldistenn vnd vor allen stern
gewesen. Wie die Lerer Leon. Cnossůs. Nicanor Archemachůs.
Xenagoras. vnnd Lůcillůs Tarrhens antzaigenn.

Aber die Phrÿges der Sachssenn wie oben gedacht ist eldistenn vorfahrnn.
vermeinten sich elder dann die Jůdenn vnnd Egÿpter zůsein. Nemlich
durch dise antzaig. Als konig Psammetich Sust nach Lateinischer
weÿs gnant Psammetichůs. wolt erfarn welche die ersten menschen
gewest wern. Schlos er zweÿ vnmůndige vnd erstgeborne kindlein allein
ein. vnnd gebot den Egiptern das sie Inn kein weg mit ÿn solten redenn.
Als nůn die vnmůndige kindlein ains hůngerten schrÿen sie. Beck. Beck.
daraůff man erfůr das die Phriger das brot Beck heÿssen. Daraůs sie
namen das die Phriger die ersten menschen wern. Welchs dann
Herodotůs in die leng Im andern Bůch seiner historien beschreibt.

Aber alle vnnůtze vmbschweiff hindangesatzt, haltenn etlich ser hochge=
larte das die Sachssenn Irn ersten vrsprůng vonn dem Folck die Traces
genant genůmmen hab. Welch Folck die Traces aůch vor der zeit
da Troia gestandenn ist. Weitberůmbt vnd fůrtreffentlich gewest ist.
Daůon man aůch vil trefflicher schrifft hat. Vnd die Cimmerÿ
oder Cimbri ein Folck der Traces. ist in dreÿ Folcker getailt gewest. Als
Nemlich in die Axenos das ist die Sachssenn. In die Mÿses das ist die
Meÿsner. Vnd In die Tÿregetas das ist die Tůringn. Vnter welchen
die Mÿsi das ist die altenn vnd Erste Meÿsner. den von Troia. als sie In
In (!) vorzeiten von den krÿechen mit einem grossen heer zehenn Jhar lang
belegt warn. zů hůlff kamen. Vnd sein nach antzaigůng des hochberůmbtn
vnd trefflichen Lerers Homeri Im zehenden Bůch Iliades ser starcke
kempffer vnd tůrnÿrer gewest. Aůch lobt benanter Homerůs
die Mÿsos oder Meÿsner aůs dem Landt Thracia komend. Sprechendt
das sie kriegserfarne. důrchlaůchtige. scheinbare. vnd die allergerechste
menschen sein. Im Dreizehenden Bůch Iliades. Von welchem aůch der
Lerer Possidoniůs schreibt das sie gotforchtig Lewth. vnd gůte krieger sein.