Bisthůmbs Vnnd die einwoner derselbenn Stat warn Thůringen. mit welchen
sie stritenn vnd behielten das port mit gewalt. vnd das ertrich gefiel Inenn
vnd sie behielten das Entzlingen mit dem schwert. Dann es was den Meer=
Rawbernn eben vnnd beqúem. vnd darůmb das sie kamen vom Saxo Marpesie
wůrdenn sie Sachssenn genant Etlich vonn ÿn zogenn an die See nach dem
holtz vnd wůrden gnant die holtzSachssenn vnnd itzůndt holsten. Wiewol
aůch etlich sprechenn das die Sachssenn von den Meÿssern den Namen habenn.
Dann noch aůff disenn tag nach westphelischer vnd Frÿsischer Sprach heisset
ein scher messer Sax. Doch ist zůglewbenn das die Messer eer von den lewthen
dann die lewth von den Messernn den Namen gewůnnen habenn.

Etlich hochůerstendige sagenn das die Sachssen Inn vorzeiten zůůor Im lateinischn
vnnd krÿechischen zůngen nicht habenn Saxones sundern Axeni geheÿssen
von wegen ÿrer vnfreůntlickait. vnd das sie wenig holtselickait gehabt habenn.
Von welchen aůch das Meer daran růrendt ist genant worden. Pontůs Axinůs.
Darnach aber als die sitenn desselbigen Folcks mit der zeit von den frembdenn
lewten. die in dasselb Lanndt handeltn gelinder. freůntlicher vnd geschickter
gemacht wůrdenn. wart dasselbig mehr. nicht mer pontůs Axinůs. Sůndern
Pontůs Euxinůs gnant. Dann als etlich achtenn. So seint die Sachssenn.
Důringen vnnd Meÿsner vonn dem vfer des wassers Jster oder Tunaw von
dem Folck Stiche vertriben wordenn. Etlich schreibenn aůff an=
zaigůng der Lerer Eratoschones vnnd Clitarchůs. das dieselben Folcker. habenn
darůmb. das ÿr lanndt zů mermaln vonn vbergiessůng des meehrs verderbt
was. Sich Inn frembde Lanndt erhebt / vnd sich dareÿn gesetzt. Wie aůch
Florůs vom Cimbrer krieg schreibt. Oder aůch vmb das ÿr Lanndt ist voll
nebell gewest. Als Homerůs Im Eÿlfftenn Bůch Odissee schreibt.
Darůmb sein sie villeicht demselben Irem Landt mit der zeit vngenaigt
wordenn. von wegenn der Finstern schweren lůfft. Mag aůch sein
das sie Inn maÿnůng mer gůter zůerlangenn seint In frembde Landt gezogen.
Aber welche der ertzeltenn maÿnůng am maisten stat hat. So ist am tag beÿ
gelartenn das der maist tail derselbenn die Boier oder Boios die vber den Reÿn
kůmmen warn. Als kayser Iůliůs Im Ersten bůch schreibt. Vnnd die so
sich am hartz gesetzt hettenn. nach antzaigůng des Possidonÿ zůstůndt
vertribenn haben. vnnd sich in dieselbenn Lanndt gesetzt.

Die vbrige vonn den selben alden Sachssen. habenn sich mit Irnn Frawen vnd
kindern am welschem gepirg. zů dem Folck Celtas die zeit Galli gnant
gefůgt. Dann die krÿechen habenn nach maÿnůng des Lerers Strabo
alle Gallos oder alle Frantzosische Folcker Celtas genent. Darůmb
schreibt Lůcillůs Tharreus vber den Apolloniům In Argonanticis (!).
Der hartz ist der Celtenn walt oder holtz. Also seint sie darnach zú den
Frantzosenn. vnd den Tewtiscken. vnd den Sweitzernn beÿ zůrch zům tail
kůmmen. vnd sich vnderstanden vmb ersůchůng newer Landt mit den Romern
zůkriegen. den entlich widerstanden habenn. Sillanus Manilius. Cepio
vnnd Mariůs. alle als der Romer hawbtlewth. Welche darnach Mariůs
gar vmbgebracht hat. Etliche vonn benanten Folckern sein gezogen Inn.