Frannckraich Nemlich an die gegent gnant Gallia Narbonensis. vnnd nachdem
sie so arm vnnd vnhabhafftig warnn. das sie wieder herberig noch ichts anders
hetten. wůrdenn sie genant Axeni. Vnnd nachdem sie sich Entlich
da dieselbenn Sachssenn beÿ In beslossenn hetten. vnfern von dem Folck Bitůriges
gnant sich zůsetzenn. Derhalbenn sie vormals Axeni gnant nach der Frantzosen
sprach hinfůr wůrdenn. Saxones das ist Sachssenn genant.

Es ist aůch nicht vngemein das etlichen wortern Im anfang der Bůchstab S
wirt vorgesetzt Dann das Folck das die kriechen Egestanos nennen. das nennen
Cicero vnnd Ptolemeůs Segestanos. Also aůch Im Silleůs sůst aůch genant
Jlleůs Als Apollonius Alexandrinůs Theon vnd Suidas antzaigen Also
aůch Im Saxům vnnd Axon. Das aber aůs dem wort
Axeni ist wordenn. das wort Saxones. ist aůch nit seltzam. das aůs dem .e.
Im Axenůs ist geworden ein o Im wort Saxones. Dann es ist gemein in der
krÿechsischenn vnd Lateinischen sprach das ein Bůchstab zúůor vnnter den
Vocalen In eÿnen andern gewandelt wirt. Darůmb halten etlich ser hochgelarte
das die Sachssenn seint obenbenants Folck etwan Axeni genant.

Wie die Sachssen am Erstenn In
diss Lanndt kůmmen sein.

Do nůn die Sachssen getailt würdenn gab ÿn das glůck das etlich obinbenanter
Lanndt in dem Erstenn Capittell als die proůincien Cimbrorům einnamen