Wie Lang darnach. aůch kam ainer vonn ÿren Fůrstn Heyling gnant in das
Landt Balthea. Welches einwoner nach etlicher maÿnůng Frÿesen gewest sein.
Vnnd behielt das mit gewalt vnnd von wegen der schonen wÿsen. wůrd das
vonn ÿn Engern genant Welchen Namen sie aůch dem HewbtSchloss
dises Lanndes gabenn. Vnnd gar In kůrtz bis an die Weser ÿr Herschafft
weiterten. Welchs Lanndt aůch auff disen tag Alt Sachssenn heist.

Wie die Sachssenn zům Erstenn die
Důringn vberfallen vnd vberwůnden haben.

Darnach beÿ dem Jhar Cristi Achtvnndzweintzigsten kam das ander tail der
Sachssen mit Irem Fůrsten Danckmar an das Tůringisch port das hatellüngen
gnant. Welchs sie aůch mit macht vberfieln. Hirúmb wůrden die Tůringn
ertzůrnet. vnd vnbegrůsset ÿres hertzogenn. den ÿn Jůliůs newlich gebenn hett.
lieffenn sie zůsammen vnd fieln vber die Sachssen vnůerwappent. Vnd wiewol
ÿr mer an der zall was. doch warn sie an stercke soůil dester geringer. Wann die
Sachssen striten wider sie mit geordenter spitzen. vnd behieltn das port mit gewalt.
doaber vil aůs ÿn verwůndt vnd erslagen warn. gaben sie den důringn als sie begertn frid.
mit der vnterscheÿdůng das sie gewalt hetten zůkewffen vnd zůůerkewffenn.