sie sich was er trüge. verspotten ÿn ain tail. Ein tail lachtenn sein.
ein tail meinten er wer vnsÿnnig vnnd strafften ÿn. Als er aber ein stille
hett erworbenn. Sprach er Volget mir nach Ir lieben gesellenn So wil ich eůch
bewern das mein torheit vnns allen wirt nůtz sein. Also Folgten sie ÿm nach
zweifelig was er thůn wolt. Also nam er denselben stawb vnd strawet den aůfs
cleinst so er mocht aůff die vmbligenden Ecker. Sprechendt. Warlich ich hab
eůch gegeben vrsachen des Fridbrůchs. Vnd als die zeit kam der Erne schneiten
die Sachssenn dise Ecker mit gewappenter handt vnd legten sich mit heer daraůff
Als das die Důring ersahen. was es ÿn vnleidlich vnd beclagten sich des Fridbrůchs
Aber die Sachssenn anthwortn. Sich kein frid gebrochen haben. Sůndern das
ertrich vmb ÿr goldt gekawfft / besitzenn.

Wie die Sachssenn mit den Důringen
gestritenn haben. vnd obgelegen sein.

Do die Tůring der Sachssen listickait vernamen verflůchtenn sie das Sechsisch
golt. vnd den sie vor gelobt hettenn den schůldenn sie ein Lanntverreter. Vnnd
In dem selbenn zorn als ir vil was. fieln sie aber vber die Sachssenn sie zůer
slagenn. Aber die Sachssen behielten das feldt. vnd Iagten die Důring
vber die heÿde an den hartz Inn das Lanndt OstSachssenn genant.