Wie die Sachssenn vom Kaÿserr
Valentinianůs sein vberzogn worden.

So der Romisch kaÿser Valentinianůs regirt / Nach Cristi gebůrt Dreÿhůndert
vnnd Im SÿbennvnndSechtzigstn Jhar. vnnd die Sachssen noch an dem
gestat des Meers Inn Gallia oder Franckraich teten sie denselbenn
einwonern mit yrem einfall vil schadens. Dann sie warnn mit
stercke vnnd tetickait gar erschrecklich ÿrenn nachparn. Darůmb
zog dieser kaÿser vber sie. vnnd bracht sie vnnder sein gehorsam mit
vil blůtvergiessens vnd seinem grossen schadenn. Gab ÿn aber
dennoch dieselbigenn Lande die sie eigenůmmen hettenn. Vnder
Jherlichem zins zůbesitzenn. Vnnd gebot ÿn fridlich zůlebenn.
Vnnd wo nicht also vil Folcker vmb dieselben zeit von dem Raich
gefallenn wern. hett er sie gar můgenn vertreiben. Des er sich die
zeit nicht dorfft vndersteenn