freůndenn vmb hilff / vnnd als sie das Los geworffenn hetten. Santen sie ÿm
ein hertzogenn aůs Ostphalenn Willikÿn genant. mit zweintzig taůsent
Wepener. do dis die Důringen sahen die do lang hettenn geliden den spott derr
Sachssen versammelten sie ein gros heer. vnnd mit hilff der Swabenn
Iageten sie alle Sachssen vber den Hartz vnd besetzten ein grossen tail desselbn Landss.

Wie sich die Grafschafft Inn
Důringen erHaben habenn.

Beÿ derselbenn zeit als etlich Cronicka habenn erhůbenn sich alle grafschafft
gemeiniglich an dem hartz gelegenn. Wann das Folck der Důring
gar erhilfflich was. Aber die Graůenn In Důringen der wapen der lewe.
mit dem krůmmen hals ist seint mit den Důringn aůs Sachssen vertri=
benn. Vnd haben ÿren namen nach gelegenhait der Stete. die von Gleichen
vmb das sie beÿ Gotha zweÿ Sloss in gleicher hohe aůf einem berg gelegn. besessen habn.
Die von keffernbůrg von den keffern der do vil ist. die von Swartzbůrg von dem
Swartzen waldt. Vnnd also aůch die andern ain itzlicher nach seiner aigenschafft.