Von der Aldenn Sachssen Erbarkeit.

Die alden Sachssen sein tůgentreiche Lewth gewesen. vnd vber die streitbarkeit
aůch annder hochrůmlicher redlickait vnd Erbarkeit. Darůmb schreibt Sant
Bonifaciůs der hailig ErtzBischoff vnd mertrer Welcher die Sachssen.
Baÿrn. Franckenn. Hessen vnd Důringen zům hailigen glawben gebracht hat.
von etlichen tůgenden der Sachssenn. Er mant aůch einen konig von Engellandt
das er woll gleich den Sachssenn sich bessern vnd nach gotlichem gefallenn richtn.
Vnd Nemlich diser meÿnůng.     Seÿnem gelibsten herren Echelbaldt
Bonifaciůs Ertz Bischoff der hailigen Romischen kirchen důrch Germanien
Legat. enbewt ewige selickait Inn Cristo.      Wir haben
gehort dů seÿst geneÿgt Almůsen zůgebenn. Verpiest diebereÿ vnd Raw=
bereÿ. liebst den Frid. vnd seÿst ein beschůtzer der armen vnnd witwenn.
Derhalben wir Got danckenn. das dů aber den eelichen standt verachst
so dů es vmb raÿnickait vnd kewsheit willen thest. wer loblich. weÿl dů.
aber dich In vnraÿnickait mit eebrůch vnd got gehailigten Iůnckfrawenn
belůstigst. So ist es scheltwirdig vnd verdamlich. Derhalben mein libster
Sůn. thw bůs vnnd betracht wie schentlich es seÿ dÿweil dů ein herr bist
das dů der vnkewschait knecht seÿest. Wir horen aůch das gar schier
die fůrnemsten alle in deinen Landen nach deinem ebenpildt Ir eeliche
weiber verlassen / vnd vnkewscher sein. Wann nůn solchs von der Erbarkeit
vnd tůgent frembd ist. so solt ir von einer ander Nacion die zcimůng lernen.