Vonn dem vnglawbenn der
alten Haidnischen Sachssenn.

Aber nebenn dem das die altenn Sachssenn seint Lange zeit ein vberstreit=
bars Folck gewesenn. habenn sie gar ein elenden vnseligen vnglawbenn
gehabt. Vnnd vber ÿr fůrnemste Abgoter. Mars. Hermes oder Mercůriůs
Hercůles vnd Apollo. aůch schier alle welde vnnd holtzer den Goternn zů
eren geeÿgent. Vnnd nach Irer vnglawbigen weis geweihet. Wann sie betten
an die Aptgotte. vnd sůnderlich Mercůriům. Welchem sie aůch an etlichen
gnantn tagen menschichs opffer mit vil blůtvergiessůng teten. darnach
wirdigtn sie aůch das Lawb. die Bewm. vnnd die Bronnen. Sie warn aller
zewbereÿ maister. des Vogelgeschreÿes / des Pferdwels. vnd itlichs Tyres enkentlich
Vnd vmb alle ding losten sie. wie aber das geschee. ist besser zůschweign vor
Cristenn lewthen. dann zůsagenn.