Von der vnglawbigen Sachssen
Abgott Krodo genant.

Die alden Sachssen hettenn In ÿrem vnglawbenn sůst aůch ein Aptgott
genant krodo. der stůndt zů Hartesbůrg In OsterSachssen nemlich diser gestalt.
Krodo stůndt auff einer Sewln vnd einem pÿrschen einem Fisch. vnnd
mit plossenn Fuessenn. zů einer bedewtůng das die Sachssen wolten
steen auff vesten fůssen. vnd das sie solten aůff schermessern barfůssig
geen. ee sie sich zů aigen ergeben soltenn.

Er was aůch gegort mit eynem Leÿnen schůrtztůch. zubezaichenn
das sie vonn Irem Got Satůrnůs freÿ werenn / Vnnd das sie sich
gegenn yren feynden. strewben gleich als ein Pÿrsch gegen dem hecht thůt.

Er het aůch in seiner Lincken handt eÿn radt. zů ainem zaichen das sich
die Sachssenn solten hart In einander schliessenn.