Jnn der rechtenn handt hett er eÿn wasseraÿmer zůbedewten das er wer ein
vrsacher der kelde. Er hett aůch rosenn Im aÿmer. zů antzai=
gůng das er wer ein brůn der frůchte. Darůmb betten ÿn die Sachssenn
an. das die keld ÿre frůchte nicht verderbt.

Danůn der hailig vnnd Gros kaÿser Sant Karrl In Sachssen kam
vnd die OstSachssen bekert. Sprach er. wer ist ewer Got. Do růfft das
gemeÿn Folck. krodo krodo is vnse Got. das ist. Krodo ist vnser Got.
Do sprach kaÿser karll. hett krodo inwe Got dat. het do kroden tůfell.
das ist. Haist krodo ewer Got. haist er kroden tůfell. Daůon kompt das
gemeÿn wort. beÿ den Sachssen kroden tůfell. Also zog kaÿser Karrll
gein Hartesbůrg vnnd verstort den Sechsischen Abgot daselbst krodo.
Vnd legt den thůmb zů Seligenstat das nůn haist Osterwick in Sandt
Steffans ere.