Wie die Sachssen zům Ersten. vnd von wem sie das hailig
Ewangeliům vnd den Cristen glawben haben angenummen.

In vorzeiten ee die Sachssen zům hailigen Cristlichen glawben kůmmenn
warn. kamen zwen hailige Priester in das Lanndt zů Sachssen baide
Ewalt genant. vnd vmb vnterscheÿd willen der hare. ainer der wais.
der ander der Schwartz Ewaldt. dieselben kamen Erstlich in eÿn dorff
gnant Laer. zuůersůchen ab sie důrch verkůndůng vnd aůslegůng
des hailigen Ewangelÿ vnd der hailbringenden ler mochtn nůtz schaffen
vnnd etlich lewt aůff den weg. der ewigen selickeit fertigenn. Vnnd
aůs gotlicher schickůng ertzaigten dieselben zwen hailige Priester zů
fůrderůng gemeiner selickait etlich wůnderwerck. Nemlich ain
mal begerten sie vonn aÿnem armen weib ein trůnck wassers.