Welchs ÿn antwort. Lieben herren. Ich hab keÿns. Dann wir leÿdenn
gebrechen des wassers. Daraůff sie Sprachen. hinfůr mer solt ÿr keÿn
mangel haben an wasserr. Vnd stachen mit ÿren steben in eÿnen fels.
an vil enden. daůon gar vil lustiger schoner Brůnn ensprůngenn.
vnd zůsammen fliessend ein wasser machten. vnd also das es ÿn keÿn
weg von der sůmmerlichen hitz wie gros vnnd schwer sich die begab
ganntz eintrůcket.

Dise zwen hailige Priester habenn aůch ein gar Lůstbar vnnd gros Feldt den
armen Lewten zů nůtz vnnd enthlat geeÿgent Welchs aůch
noch hewtiges tags wirt genant die Hailig wisenn. In welcher mittell
vorbenant wasser flewst. vnd den menschen vnd vnůernůnfftigenn
thirn frůchtbar vnnd lůstig ist.

Ist gewest ein gemein red. das etlich vonn Got gestrafft sein die sich
wider der hailigenn testament haben vnnterwůnden dis feldt zůackern
vnnd Inn ÿren eigen nůtz zůwenden.

Item das einmal eynem Pawerman als er da Ackernn wolt sein
pferd vom Wetter sein entzůndt wordenn. Vnnd das er kaůmet
darůon seÿ entwordenn. Ain ander als er in gleichem
fůrnemen het dreÿ fůrch geart. sah er sie mit blůt erfůllet.

Derhalbenn die hailigen zwen Merterer baide Ewaldt daselbst bis
aůff den hewtigenn tag geert werdenn. Vnnd das gemeÿn Folck
nent sie die herren von der Wÿsenn.

Man findt beschriebenn das ein gemein gerůcht seÿ aůch in vorzeiten
beÿ den Eldistenn Sachssen gewest. das wer vonn der benanten wÿsenn.
etwas benem. der můs Inwendig einem Jhar eines bosen tods abgeen.
Welchs aůch also mit dem werck bestetigt vnnd erweiset seÿ. Dann
einmal hab der Obirsten ainer beÿ dem Fůrstenn derselben Lanndt
sůst ein gar redlich Erbar vnnd Edel man. dieselben hailigen wÿsen
mit rawb angegangen. vnd sey desselben Jhars vnter dem scheÿn
der gerechtickeit ader rechtfertigůng zů eÿnem totslag kůmmenn.
Derhalben aůch kůrtz darnach enthawbt. Daraůff ein gemein
red vnnd maÿnůng erwůchs die herren der Wÿsenn hetten sich gerochen
Wann der benant man was sůst So mechtig das es yederman fůr
vnmůglich achtet. das es sich zů solchem vnfall mit ÿm solt begeben.
Vber das. das ÿm der Fůrst gern darůon hett geholffen mit sambt
aller seiner freůntschafft. Aber alles vnnůtzlich vnnd vergebens
zů vnnterhaltůng seines lebens.

Ain frembder Fůrst wiewol daůor vonn etlichen dess verstendiget.
doch hat er sich seins můtwillens daran nicht wellen enthalden.