Daraůff er Inwendig dreÿer Monat ist gefangen wordenn. vnd die andern
die Ims widerratenn hetten sein darůon kůmmen.

Ain Edelman des gnůgsam wissendt / vnd nichts destermÿnder sein vnselige
kůnheit daran versůchendt. ist vnsÿnnig wordenn. Vnd hat sein eigen
hendt. verzert. vnnd ist also gestorbenn.

Dise zwen hailige Priester zogenn weiter vber die Wÿsen. baten sie
einen pawrman vmb herbrig. vnnd das sie zů dem Ambtman mochtn
geweist werdenn. vmb etlicher geschefft willenn die sie beÿ Im aůs
zůrichten hettenn. Darzů sich der Pawr freůntwillig erbot. Aber
zůstůndt als die nachbarn erfůrn das sie Cristen warn. ertrencktn
sie dieselbenn Welchs gescheen ist nach Cristi gebúrt
Sÿbenhůndert Ihar. am dritten tag des Octobres. Im Bistůmb zů
Bremen In der Grafschaff Hoÿe. Als diss der Ambtman erfůr.
verschafft er die pawrn die die hailigen Priester ertrenckt hettenn
zůtotenn. vnd ÿr dorff zůůerbrennen.

Etlich sagenn das die hailigenn mertrer baÿde Sant Ewaldt an der gegent
genant Appellerbeck beÿ dorpmůndt ertrenckt sein. Welchs aůch von
vonn etlichenn fůr glawbwirdig geacht wirt.

Etlich verantwortenn dieselb Vnaÿnig vermeldůng also. das die hailign
mertrer am erstenn endt. sein verwůndt. vnd am andern gentzlich
ertott.

Darnach sein diser hailigenn leichnam wůnderwarlichen gein Coln.
Inn Sandt Cumberts kirchen kůmmenn.

Vnnd diss ist gewest die erst besendůng vnnd botschafft des hailigen gaists
an die Sachssenn sie zům hailigen glawben zůbekernn.