Wenn ir aber den Cristenn glawben nicht wellet annemen so wissendt
das ein konig in den nahen Landen beraÿt ist eůch zůkriegenn.
Derselb wirt eůch mit kriegenn verderben. vertreiben. ewer gůter nach
seinem gefallenn frembden Lewten geben. vnnd eůch ÿm vnd seinenn
nachkůmmenn vnterthenig vnnd vnterwůrffig machenn.

Daraůff die Sachssenn mit grossem vnnd vngestÿmmen geschreÿ
schrÿenn. Greifft ÿn vnnd steint ÿn. Also wart Sant
Lebůin den awgen der Sachssenn enzogen. Derhalben die vernůnf=
tigenn Sachssenn vber solch vnzimlich fůrnemen. bewegt wůrdenn.

Aůch stÿg ein Prediger aůff ain Stock vnnd schrÿ also. hort ÿr.
wenn dÿ. Nortmanner. Friesen. Wenden. vnnd aller
anderer Nacion Lewth ÿr Botschafft zů vnns schicken / So nemenn
wir vnd horen dieselben fridlich vnnd freúntlich. Vnd Gottes
botschafft habenn wir itzt so vbell vnnd schmeelich entpfangenn.
Glawbt mir er hat vnns die warheit gesagt. Vnnd das alle die ding
ergeen werdenn die er vns gewiss gesagt hat. Darůmb
wůrden sie mit laÿd bewegt. voriger tat vnnd geboten das ÿderman
den hailigen Lebůin solt vngeletzt. vnd freÿ lassen. wo er hin wolt.
so er sich fortmer ertzaigenn wůrd.

Es ist aůch noch bis aůff den hewtigenn tag. ein Bawm. nicht fern von
der Stat Herůord. vnd so wůnderlichen vnnd seltzamen bletternn.
das nÿmants waÿs was es fůr eÿn Bawm ist Derselb Bawm sal
sich aůs gotlicher schickůng geoffent haben. Sant Lebůin In
ÿm zůschůtzenn.