Wie kaÿser Karrl zehenn Bistümb Im Landt zü Sachssen
gestifft hat. Vnnd zům Erstenn Osnabrůck.

Auff das nůn die Sachssenn also Im glawben blÿben. vnnd nicht wider
vmb fieln macht der hailig kaÿser Karrll das ganntz Landt zů
Sachssenn nach Cristi gebůrt Sÿben hůndert vnnd Im sechsvndachtzigstn
Jhar der gaistlickait vnterthenig vnd tailt Sachssen in zehen Bistůmb
die er alle darInn aůffricht. vnd alle mit hailign Bischoffn versah vnd bestellet.

Zum Ersten hat er gestifft das Bisthůmb zů Osnabrůck In eÿnem
gar lůstigenn tal an der hasa gelegenn.

Dise kirchenn hat kaÿser karll sůnderlich geliebt / vnd mildiglich
versehenn. vnd begabt. Aůch mit klaÿnaten vnd vil hochwirdigem
hailthůmb getzirt. vnd daselbst zů ewigen zeiten grekisch vnnd
Lateinisch zuhalden geordent. Hat aůch dahin zů dem Ersten
Bischoff gesatzt einen Ernwirdigen. herrenn Wÿhe genant.
Vnd nachdem der hailig kaÿser karrl ein besůnder andacht zů dem hailigen
ApostelFůrsten Sant peter gehabt. hat er die Stifftkirchen zů Osnabrůck
in Ere Sannt peters lassen weÿhen. vnd Sant peter zů ainem hawbtherren
des gantzen Stiffts verordent. Nach Cristi gebůrt Sybenhůndert Vnd Im
zweÿvndSibentzigsten Jhar. Welchen Stifft konig wÿdekint nach seiner
bekerůng aůch hochlich. als die můter. geert. gefůrdert. vnd begabt hat.