Bistümb also eingeleibt. das aůs denselbenn baiden Bistůmben aÿn
Bistůmb wart. Da Sant Anschariůus aůch Achzehenn Jhar ErtzBischoff
was. Vnnd heist bis aůff hewtigen tag. das Bistůmb. Bremenn.
Vnnd ist ein ErtzBisthůmb. etwan ein Bistůmb. vnnd In vorzeiten.
dem ErtzBistůmb zů Colnn vnnterworffenn.

Aůch vbtenn sich die Sachssenn so loblich vnnd trefflich in dem gotlichen
dinst. vnnd allen Cristlichen tůgenden. das sie vil kirchen. Closterr.
vnnd Spital baweten. vnd dieselben mit aller gnůgsamkeit. ver=
sorgtenn. Derhalbenn der hailig kaÿser karrll den Sachssen
ÿe lenger. ÿe gneigter wůrd. vnd so gnedig. das er vil Im Landt
zů Sachssenn lag. sein meÿste Fest in Sachssenn hielt. Vnnd In
aigenerperson recht sprach. Welchs er aůs sůndererr
gnad gegen den Sachssenn etlich Jhar aneÿnander treÿb.

Inn dem als er nach Cristi gebůrt Sÿbenhůndert vnnd Im
NeůnvnndNeůntzigstenn Jhar. zů Padebornn lag. kam ÿm
potschafft wie das die trewlose Romer den frůmmen Babst Leo
des namen der dritt. verfolgt hettenn. Vnnd wie sie
ÿm sein awgenn aůsgebrochen. vnd sein zůngen aůsgesnitten
hettenn. vnnd darůber wider Got vnnd alle zcimůng In ein
gefencknÿs geworffenn. Aber das er důrch gotlich
gnad von allem disem grawsamen vnfall erledigt vnnd
ganntz wieder geheÿlt wer. Aůch das derselbig hailig Vater Babst
aúffm weg wer. In den hailigenn kaÿser karrll Im Landt zú
Sachssenn zůersůchenn. Welchs der hailig
kaÿser mit hocherfrawetem gemůt erfůr. vnnd alle ding zů.
wirdiger annemůng eines solchen hochwirdigen gasts lies beraiten. Er
schicket aůch seiner Bebstlichen hailickait vnter awgen seinen Sůn. karll
mit eÿnem heer. Vnd als die Bebstlich heilickait [ergänze: eintraf] entpfieng er sie aůch selbst
aůffs wirdiglichst / erlichst / vnnd herlichst mit vnmessiger frolickait
seiner selbst kaÿserlich Maiestat vnnd aller Cristglawbigen. Vnd fůrt darnach
den Babst Im Lanndt zů Sachssenn. aůff vnnd ab. hin vnd wider. der
Lanntschafft vnnd allem Folck. die Bestliche [lies: Bebstliche] benedeÿůng mitzůtailn.
Vnd es Im hailigen Cristenglawben zůbesteten. Darzů die
Bebstlich hailickait gar willig was. Wiewol seiner hailickait
ser schwer vnd nach teilig was da zůůerweilenn. Aber wie dem. so was
der Babst dem kaÿser zůwillen. Vnnd weÿhet vil kirchenn
in Sachssenn. Daůon noch hewtiges tags ein Frisch vnd vnůerblichen
gedechtnÿss ist.