Zům erstenn weihet die Bebstliche hailickait die Thůmkirchenn
zů Padebornn In Ere vnnser liebenn Frawenn.

Darnach die kirchenn zů Hamelem Jn Sant Bonifaciůs Ere.

Zům Drittenn ein kirchen gnant die Berckirchenn beÿ Mÿndenn
In dem dorff des Bergs Widikenberg Inn Sandt Niclas Ere.
In welcher kirchenn mittel ein gar schoner Brůnn ist. Vnnd ein
glocklen aůch in derselben kirchen ist die Sandt Leo der hailig
Babst daselbst gelassenn hat.

Aůch weihet diser hailig Babst zů Sÿbůrg ein meil wegs von Tramůndt
ein kirchenn. Vnnd gab dem Landt zů Sachssen soůil
hailthůmb. Ablas. priůilegienn. vnd Freihait das noch vil red daůon ist.

Darümb so der Almechtig Got die Sachssenn mitsoůil grossen gnaden
gnediglich versehen hat. ist wol abzůnemen das er dasselb Folck in
seiner gotlichen gnaden schůtz. vnd handhabůng genůmen. vnd
erwelt hat.

Darnach als der hailig kaÿser Karrll alle sachenn in Sachssenn wol
vnd gnůgsam bestelt hett. vnd in gůter hoffnůng war. sie wůrden
fortmer vnd ewglich Im Cristlichen glawbenn bestendig bleÿben.
zog er Fast Im SechsvnndFůnfftzigsten Jhar seines alders aůs dem
Lanndt zů Sachssen. In maÿnůng. wie er aůch glúcklich
vnnd seliglich verendt. die obgnante Bebstliche hailickait In vorig
wirdickait vnd stant wider einzůsetzen. vnd das hailig Romisch
Raich in allenn Landen aůffs vleisigst zůůersehenn vnnd
zůregirenn.